అమ్మా నాన్న

అమ్మ
విత్తనాలని పంటలుగా మార్చే రైతు అమ్మ
మబ్బులుని వానలుగా మార్చె వాన అమ్మ
మన జీవిత నౌకకి తెరచాప అమ్మ
ఈ బ్రహ్మ సృష్టించిన మరో బ్రహ్మ అమ్మ
నాన్న అన్న పదానికి ముందు లేక పోతే అమ్మ అనె పదం
ఆ పదానికి వుండునా నిజమైన అందం
అమ్మ గూర్చి చదవాలంటే చాలునా ఈ చిన్ని జన్మ
ఎంత చదివినా ఒక వాక్యం మిగిలుండే ఉద్గ్రంధం అమ్మ .

నాన్న
నాన్న అన్న పదము కన్న
కమ్మగ వుండదు ఆ వెన్న
లక్షం వైపు దూసుకెళ్ళే బాణం మనమైనా
నాన్నలాంటి విల్లే లేక పోతే దాని ఫలితం సున్నా
నాన్న పెంపకములో కఠినత్వం వున్న
ఆ పెంపకానికి కారణం రేపటి మన భవిష్యత్తుకు ఆయన పడే తపన
రేపటి మనకు నిలువుటద్దం నాన్న
అలాంటి నాన్న దేవుడి కన్న మిన్న .

మాతృదినోత్సవం రోజున అమ్మ మీద , నాన్న పుట్టిన రోజున , నాన్న మీద ఈ కవితలు రాశాడు , మా మేనల్లుడు జశ్వంత్ . అవి చూసి వాడేదో పెద్దవాడు అను కోకండి . అదో అప్పుడే గుర్రు మంటున్నాడు , అత్తా నేమైనా చిన్న వాడినా చితక వాడినా ఇప్పుడేగా టెంత్ క్లాస్ కు వచ్చాను అని . ఓకే వొప్పుకున్నాను , నువ్వు కుంచం బెద్దవాడివని సరేనా .అబ్బో వాళ్ళ అమ్మనాన్నల మొహాలు చూడండి ఎలా వెలిగిపోతున్నాయో !!!
ఇలాగే కవితలు రాసి నాకు ఇస్తూ వుండరా బాలకవి . థాంక్ యు జశ్వంత్ .

స్వాతంత్రం

మా చిన్న తమ్ముడి ( మా పిన్ని చిన్న కొడుకు ) కుమారుడు జస్వంత్ . గూడూరు లో 9 వ తరగతి చదువుతున్నాడు . వాడికి మా కుటుంబ వారసత్వం , కవితలు రాయటము వచ్చినట్లున్నది . కవితలు రాయటము చాలా ఇష్టం . అందుకే రాత్రి అందరూ నిదురపోయిన తరువాత రాసుకుంటూ వుంటాడు . బాబ్బాబు నాకు కవితలు రాయటము రాదురా , కాసిని నీ కవితలు నాకివ్వు , నా బ్లాగ్ లో వేసుకుంటాను అంటే దయతలచి ఇచ్చాడు . అందులో ఒకటి స్వాతంత్రము మీద రాసినది , గణతంత్ర దినోత్సవము సంధర్భముగా .

ఆంగ్లేయు లు మనపై చేసిన కుతంత్రం

ఏమీ చేయలేక పోయింది ఏమాత్రం

సత్య అహింస లనే గాంధీజీ సూత్రం

" ఇంక్విలాబ్ జిందాబాద్ " అన్న ఆజాద్ గాత్రం ,

ఎదుటివారు ఎవర్నైనా చిత్తు చేసే ఖడ్గ మంత్రం

ఎందరో వీరుల రక్త స్తోత్రం వలన

దేశానికి దొరికింది స్వతంత్రం .

కాబట్టి మరువకూడదు వీరందరినీ ఏమాత్రం .


బారతీయు లందరికీ గణతంత్ర దినోత్సవ శుభాకాంక్షలు .

అమ్మ ఆశీర్వాదము

ఈ రోజు మా అమ్మ పుట్టిన రోజు . ఉదయమే అమ్మను విష్ చేసి వద్దామని నేను , జయ అమ్మ దగ్గరికి వెళ్ళాము . అమ్మకు నేను , నా కిష్టమైన లిల్లీపూల గుచ్చాన్ని , ఒకచీరను బహుకరించి ,అశీర్వాదము తీసుకున్నాను . జయ , అమ్మ కోరిన , శ్రీమద్బగవద్గీత , గీతాప్రెస్ , గోరఖ్ పూర్ వారిది , వారివే చిన్న చిన్న పాకెట్ శ్రీమద్బగవద్గీత లు ఓ పది , ఒక స్వీట్ పాకెట్ ఇచ్చి ఆశీర్వాదము తీసుకున్నది .

అందరూ వాళ్ళ బ్లాగులలో కవితలు రాస్తారు , నాకేమో రాయటము రాదు , నిన్ను రాసి ఇవ్వమని ఎన్నిసార్లు అడిగినా ఇవ్వవు అని , నేను మా అమ్మతో పోట్లాడుతే , మాజయ కొడుకు ప్రశాంత్ , మా మనవరాలు మేఘ , పుట్టిన రోజు నాడు రాసిన ఆశీస్సుల కవితలు తీసి ఇచ్చింది . ఇవి ఇప్పటివరకూ మాకెందుకు చూపలేదు అని ,ఇంకోసారి పోట్లాడి తెచ్చుకున్నాను .. ఇదిగో ఆ కవితలు .

1. ప్రశాంత్ పుట్టినరోజు అక్టోబర్ 2 . ఆ రోజున అమ్మమ్మ ఆశీస్సులు :

ఎ౦దరో మహాత్ముల జన్మలాగే

ప్రశా౦తుని జన్మ కూడా మేరు

శిఖర మంత అఖండ ఖ్యాతి పొం

దాలని పెద్దల శుభాశీస్సులు .

2 .మా మనవరాలు మేఘ పుట్టినరోజు మార్చ్ 5 .ఆ రోజున పెద్ద అమ్ముమ్మ ఆశీస్సులు .

ముత్యాలు రాశి పోసి నట్లున్న

మురిపాల నవ్వుల ముఖ్య అతిధి

మేఘాల నుంచి రాలి పడ్డ సుమ

బాలకు జన్మదిన శుభాకాంక్షలు .